وداع العزّ..!

[نايف العتيبي]

ليا صارت هروج الناس عن لاماك تحداني=فمان الله ودربٍ جابني يمّك يودّيني
أنا ماأبغاك تحمل شرهة العالم على شاني=ولاودّي تشوف من الزمن ماشافته عيني
ياكثر العالم اللي بين جيرانك وجيراني=مشافيحٍ على هرج القفا والناس مقفيني
وياكثر العالم اللي هرجها لو هزّ وجداني=أكابح هرجها باالصمت حتى لو يجزّيني
عليّ الله وأمانه لو أعيش العمر وحداني =ماأسولف للعرب باالقصّه اللي بينك وبيني
يكفّيني منادم خافقي عن وضع حرماني=ولاأبيّن لو إنّ الدمّ يجمد في شراييني
هذا عهدٍ عليّ إن كان طال العمر وأمداني=وإذا حال القدر تكفى إعتبر من ماضي سنيني
إخذ درسك من دروس السنين العوج مجّاني=قبل بكره تقول المشكله ماعاد يمديني
ترى دروس الزمن ماتفرق الأول من الثاني=دفاترها القلوب وتكتب بروس السكاكيني
لاينعى الوقت راسك قبل لايوفي وينعاني=وأنا ماقلتها الا حشمةٍ لأغلى عناويني
أنا ويّاك يكفينا من الأيام ماجاني=ماأبيك تشيل دين الوقت وأشيله على ديني
وأنا حافظ وصاة الشايب اللي يوم وصّاني=على حفظ المعزّه مع هل الحشمه موصّيني
أبوادعك مثل أول نهارٍ جيت لك عاني=على شان (إ)تعرف وش كثر مهما كنت تعنيني
وداع العزّ حفظ لسمعتك من هرج عدواني=وداعٍ مثل توديع إبن عون لطيره الصيني

تحياتي