رحلة عُمر .. !!

[محمد سعود]

السلام عليكم ورحمة الله وبركاته

مراحل يمر به الجميع

كتب ويكتب عنها الناثر والشاعر ، اخذت جانب منها وتكلمت عنه بهذه المتواضعه

فهل تنال القليل من استحسانكم ؟؟

ليس لدي اجابة ، اتركها لكم مع التحية

v

عشرين عامٍ فوقها بضعة اعوام=وانا مع ظروف الزمن بختباصي
مرات احث النفس واسوق لاقدام=واحيان ادور ، وين ؟ بلقى خلاصي
رحلة عُمر جفت بها رووس لاقلام=صفحة مآسيها تشيب النواصي
ثلثينها راحت مع وافي اقسام=والثلث الآخر هو سبايب خصاصي
غربه وقايعها كما طيف الاحلام=على الذي ما ذاق مُر امتغاصي
اوزّع البسمات والقلب منضام=واهني اللي ما اغتبق من قلاصي
واداري العثره عن عيون الاخصام=ويا كثرهم مابين داني وقاصي
واللي هرج بالوجه ألَجّمه بلجام=واشوم عن بعض الحكايا الرخاصي
هويت غيدا دونها حفيت اقدام=وكم هيةٍ كادوا حرسها اقتناصي
الله ستر واخذت بعزومي وسام=صبر وجساره ليّنت كل عاصي
من بعدها تبسمت بيض الايام=وسجيت لي عامين دون احتراصي
اقطف ورود الشرق والغرب والشام=ومنهو نصحني قلت: عَنْك ! اختصاصي
فجأه عرفت ان الهوى كله اوهام=ودرب السنع واحد ولا لي مناصي
من يشعب العوصا بلا قيد واخطام=حكم على نفسه نفاذ القصاصي
وعمر الفتى محدود لو طال ما دام= له مبتدا ، ثم انتها ، وانتقاصي